Градоначалникот Бобан Стефковски преку видео на социјалните мрежи објави дека започнала изградбата на најголемиот парк во општина Гази Баба, кој ќе се простира на површина од 10.000 квадратни метри во новоизградената населба Хиподром 2.
Стефковски нагласи дека општината продолжува со својата посветеност кон зачувување на животната средина. Според него, новиот парк ќе им овозможи на жителите простор за спорт и рекреација.
Покрај зелените површини и урбаната опрема, во паркот ќе се засадат нови дрвја, ќе се изгради терен за кошарка и ќе биде поставена фитнес зона на отворено.
„Ова не е првиот голем парк што го реализираме. Во изминатиот период, нови зелени површини беа изградени и во населбите Триангла и Ченто“, кажа Стефковски.
