Основното јавно обвинителство во Битола покрена постапка против 39-годишен битолчанец осомничен за кривично дело – Противправно лишување од слобода според член 140 став 5 во врска со став 2 и став 1, како и за Телесна повреда според член 130 став 2 во врска со став 1 од Кривичниот законик.
Според наводите, на 21 октомври, осомничениот за време на семејно насилство ја затворил и држел во заточение својата поранешна партнерка, нанесувајќи ѝ телесни повреди. Оштетената, пред својата куќа, влегла во возилото на осомничениот, кој веднаш започнал да ја удира со тупаници во главата. Потоа ја однел во својата викендица во Нижеполе, каде ја турнал, ја заклучил и продолжил да ја удира со шлаканици, тупаници и клоци по главата и телото. Ова насилство траело околу еден час.
Во обид да го прекине злоставувањето, оштетената посегнала по кујнски нож и си ги пресекла вените на левата рака, но осомничениот не запрел и продолжил да ја удира, предизвикувајќи дополнителни телесни повреди.
Обвинителството до судот доставило предлог за определување мерка притвор за осомничениот, кој е во бегство. Притворската мерка ќе стапи на сила по неговото пронаоѓање, лишување од слобода и приведување.
