Новопоставената урбана опрема во Градскиот парк во Виница повторно се најде на удар на несовесни поединци. Од Општина Виница информираат дека при редовните проверки е утврдено оштетување на дел од опремата која неодамна беше поставена за потребите на граѓаните.
Локалната самоуправа најостро ги осудува ваквите постапки, нагласувајќи дека уништувањето на јавниот имот претставува директна штета за целата заедница. Урбаната опрема е обезбедена со средства на граѓаните и е наменета за подобрување на јавниот простор и квалитетот на животот во општината.
Од Општината упатуваат повик до жителите да покажат поголема грижа и одговорност кон јавните добра, како и навремено да ги известуваат надлежните институции доколку забележат вандалско однесување.
Во наредниот период инспекциските служби ќе спроведуваат засилени контроли на терен и ќе преземаат мерки согласно законските прописи против сторителите на ваквите дела.
Паралелно со тоа, екипите на Општина Виница и ЈП „Солидарност“ веќе работат на отстранување на штетите и обновување на оштетената опрема.
Од локалната самоуправа апелираат и до Министерството за внатрешни работи да обезбеди почести патроли и надзор во паркот, со цел спречување на идни инциденти и откривање на одговорните лица.
Веста ја пренесува 24chasa.mk
