Белград – Со достоинство и тишина, денеска се одбележува третата годишнина од трагичниот настан во основното училиште „Владислав Рибникар“, кога беа изгубени невини животи. Граѓани, претставници на институциите и семејствата на жртвите оддаваат почит, потсетувајќи на болката што и понатаму е присутна.
На 3 мај 2023 година, во напад извршен од малолетен ученик, животот го загубија девет ученици и еден училишен чувар, додека неколкумина беа повредени. Настанот остави длабока трага не само во Србија, туку и пошироко во регионот.
Претставници на државниот врв, меѓу кои и премиерот Ѓуро Мацут, положија цвеќе и им оддадоа почит на жртвите. Поради возраста на сторителот во моментот на злосторството, против него не може да се води кривична постапка, но правниот процес продолжува против неговите родители.
Во меѓувреме, судската постапка повторно се разгледува пред Вишиот суд во Белград, откако претходната пресуда беше укината од Апелациониот суд.
За време на комеморацијата, беше забележан и инцидент кога пиротехничко средство беше фрлено од блиска зграда, по што полицијата веднаш реагираше и започна истрага.
Само еден ден по оваа трагедија, на 4 мај 2023 година, се случи уште еден тежок злостор во околината на Младеновац, каде повеќе лица беа убиени и повредени, главно млади луѓе.
Во Србија, 3 и 4 мај се одбележуваат како денови на сеќавање на жртвите од масовните убиства, додека во училиштата од 4 до 8 мај се организираат активности во рамки на Неделата на сеќавање и единство.
Европската Унија, преку својот амбасадор во Србија, Андреас фон Бекерат, упати порака на солидарност и поддршка, нагласувајќи ја важноста од заедничко сеќавање и превенција на вакви трагедии во иднина.
Веста ја пренесува Nezavisen.mk
