Македонија денес се простува од својот млад борец – 16-годишниот Матеј од Идризово, кој по повеќе од три недели борба за живот им подлегна на сериозните повреди од сообраќајната несреќа со пратеникот од Левица, Сашко Јанчев. Веста беше потврдена од Здружението на хемофиличари на Македонија, чиј член беше Матеј.
„Нашиот малиот херој замина кај ангелите… Имаше само 16 години, животот му беше пред него“, соопштија од здружението.
Матеј беше познат по својата храброст во справувањето со хемофилијата и отворено зборуваше за својата состојба, инспирирајќи многу луѓе со искреноста и силата што ја покажуваше. „Никогаш нема да те заборавиме, болката е неизмерна“, порачаа неговите блиски и пријатели.
Несреќата се случила на 14 септември во село Марино, општина Илинден, кога мопедот што го управувал Матеј удрил во џип „Хјундаи Тусон“ со пратеникот Јанчев (36) од Гевгелија. Со тешки повреди беше здобила и 13-годишната сопатничка на Матеј, додека Јанчев и неговиот сопатник се здобиле со полесни повреди.
Од МВР информираат дека веднаш по несреќата бил извршен увид, а пратеникот бил лишен од слобода и приведен под сомнение за загрозување на безбедноста во сообраќајот и тешки дела против безбедноста на луѓето и имотот.
Матеј ќе остане запаметен како млад, насмеан и храбар човек кој со својата сила и дух остави трајна инспирација. Почивај во мир, млад хероју.
