Постои план за реализација на втората фаза од проектот за изградба на жичницата во Скопје, која ќе ги поврзува Капиштец и Средно Водно. Владата потврди дека ќе продолжи со реализацијата на овој проект, со цел да се овозможи пристап до планината Водно без употреба на возила, промовирајќи одржлива и еколошка мобилност, објави „Сакамдакажам“.
„Сметаме дека овој проект има клучно значење за градот Скопје. Жичницата веќе е секојдневно користена од голем број посетители, како локални жители, така и туристи, што ја нагласува потребата од комплетно поврзување на градот со Водно,“ изјави Ивица Томовски, директор на Службата за општи и заеднички работи при Владата.
Тој додаде дека во наредниот период ќе се спроведат детални анализи за да се ревидира претходниот проект и да се утврди дали е неопходно негово прилагодување.
