Во општина Аеродром започна нова акција за отстранување на стари и хаварисани автомобили кои долго време стојат на јавни површини и зафаќаат драгоцени паркинг-места.
Според информациите споделени во групата „Општина Аеродром – Граѓанска патрола“, инспекциските служби денеска започнале со подигнување на возилата кои се оставени и не се користат подолг период.
Во акцијата се вклучуваат и граѓаните, кои се повикуваат да ги пријавуваат проблематичните локации. Доколку забележат напуштен, стар или оштетен автомобил кој со месеци стои на јавен паркинг, можат да испратат фотографија и точна локација преку „Гугл мапс“ или да ја наведат адресата.
Целта е да се направи што поточна евиденција на ваквите возила, по што списокот со локации би бил доставен до надлежните служби за понатамошно постапување.
Проблемот со хаварисаните автомобили не е нов за жителите на Аеродром. Во дел од населбите тие со години остануваат на истите места, иако не се во употреба. Освен што дополнително го намалуваат бројот на достапни паркинг-места, некои од нив со текот на времето стануваат места за складирање различни предмети и отпад.
Од Општината претходно информираа дека во една од акциите биле отстранети 15 хаварисани возила. Дополнително, 22 сопственици сами ги преместиле автомобилите откако добиле известување. Тогаш беше посочено дека на територијата на цела општина има стотици стари, нерегистрирани и хаварисани возила.
Потребата од расчистување на јавните површини стана уште поизразена со најавите за проширување на зонското паркирање во Ново Лисиче и Реонски центар. Во мај, сопствениците на хаварисани возила во Ново Лисиче беа известени дека треба самите да ги отстранат автомобилите за да може да продолжи уредувањето и обележувањето на паркинг-просторот.
Оставањето нерегистрирани и хаварисани возила, како и приколки и камп-приколки, на јавни површини е спротивно и на општинските правила.
Од граѓанската иницијатива сега апелираат до жителите активно да ги пријавуваат ваквите случаи. Колку повеќе точни локации бидат доставени, толку полесно надлежните служби ќе можат да ги евидентираат и процесираат возилата.
Веста ја пренесува Infomax.mk
