Амбасадорот на Јапонија, Н.Е. Оцука Казуја, денес присуствуваше на свечената церемонија на примопредавање на завршениот проект во рамките на Програмата за грантови за мали проекти (GGP) во Јавната здравствена установа (ЈЗУ) „Здравствен дом Неготино“.
Домаќини на настанот, организиран во знак на благодарност за оваа значајна донација, беа градоначалникот на општина Неготино, д-р Горан Стојанов, и директорот на Здравствениот дом, д-р Љупчо Пасинечки.
Како дел од проектот, установата доби современ дигитален рендген апарат со вкупна вредност од 61.001 евро. Оваа инвестиција ќе придонесе за значително унапредување на квалитетот на здравствените услуги за жителите на Неготино и околината.
Програмата за грантови за мали проекти (GGP) досега поддржа над 70 иницијативи во здравствениот сектор со вкупна вредност од речиси 4 милиони евра. Дополнително, во 2021 и 2022 година, како одговор на пандемијата на COVID-19, Јапонија обезбеди медицинска опрема за јавните здравствени установи во вредност од 813.000 евра, преку Програмата за економски и социјален развој. Оваа помош вклучи и лекови за третман на 100 пациенти заболени од COVID-19.
Од 1996 година, преку GGP програмата, Јапонија финансира реновирање и опремување на образовни и здравствени установи, како и комунални проекти низ Македонија. Досега се реализирани над 76 проекти за училишта и градинки, 70 за здравствени установи и набавка на 36 специјализирани возила за управување со отпад, кои се распределени во 56 општини. Вкупната вредност на сите овие проекти изнесува над 9,2 милиони евра, стои во официјалното соопштение од Амбасадата на Јапонија.
Овој гест е уште еден доказ за долгогодишното пријателство и соработка меѓу Јапонија и Македонија, со особен акцент на подобрување на животниот стандард на граѓаните.
