Започна хуманитарна акција за собирање финансиски средства за лекување на 24-годишната Теодора Ампова од Македонија, која се соочува со тешка здравствена битка. Кај неа е дијагностициран метастатски карцином на ректум, а болеста, за жал, се проширила и на белите дробови.
Во изминатиот период Теодора ги примила сите достапни медицински третмани во Македонија. Лекувањето опфатило системска хемотерапија, палијативна радиотерапија и втор циклус хемотерапија. И покрај вложените напори и нејзината силна волја, последните лекарски прегледи покажале дека болеста продолжува да напредува.
Нова можност за лекување ѝ е понудена во болницата „Медикана Хелт Груп – Атакој“ во Истанбул, каде што медицинскиот тим, предводен од проф. д-р Еркан Доган, ја прифатил за понатамошен третман. Според препораките на специјалистите, потребно е да се извршат дополнителни испитувања, молекуларно-генетски анализи, можна биопсија и започнување третолиниска системска терапија.
Ситуацијата дополнително ја отежнува фактот што лекот „Лонсурф“ (Trifluridine/Tipiracil), кој е неопходен за терапијата во комбинација со „Бевацизумаб“, не е достапен во Македонија. Поради тоа, лекот мора да се набави од Турција, што значително ги зголемува трошоците за лекувањето.
Организаторите на хуманитарната кампања упатуваат искрен повик до сите луѓе со добро срце да се вклучат и да помогнат согласно своите можности. Секоја донација, без разлика на износот, како и секое споделување на апелот, може да придонесе Теодора да добие уште една шанса во својата борба.
Собраните средства ќе бидат искористени за покривање на трошоците за лекувањето во Турција, со надеж дека младата мајка ќе може да го продолжи лекувањето и да остане покрај своето 18-месечно дете, се вели во апелот.
