Разорните шумски пожари продолжуваат да пустошат во повеќе региони низ Грција, а најкритична е состојбата на јужниот дел од островот Крит, особено во областа Ретимно. Огнената стихија, поттикната од силни ветрови, веќе втор ден им создава огромни проблеми на противпожарните екипи. Сериозна е ситуацијата и на островот Парос, каде пожарите сè уште не се ставени под целосна контрола.
Ветровите, кои на моменти достигнуваат брзина и до 125 километри на час, значително ја отежнуваат борбата со огнот. Поради опасните временски услови, хеликоптерите и останатите воздушни летала не можат безбедно да интервенираат. И покрај неколкуте обиди за полетување, екипите не успеале да се доближат до најзагрозените подрачја.
Најтешко е во пределот меѓу Агија Параскеви и Лакумија, каде пламените јазици со голема брзина се шират низ ниската вегетација. Во гаснењето се вклучени 224 пожарникари, 53 противпожарни возила и 11 специјализирани тимови за шумски пожари.
Трагедијата ја одбележаа и човечките загуби. Двајца пожарникари, на возраст од 25 и 58 години, загинаа во јужниот дел на Ретимно откако останале заробени во противпожарното возило. Поради густиот чад ја изгубиле ориентацијата и не успеале навреме да се извлечат.
Третиот пожарникар, 27-годишен припадник на службата, починал за време на интервенција во областа Гитион на Пелопонез, како последица на здравствени компликации.
За денеска се најавени погребите на двајцата загинати пожарникари од Крит, на кои ќе присуствуваат и претставници на грчката влада.
Поради брзото ширење на пожарите, во текот на ноќта биле евакуирани околу 8.000 жители и туристи од неколку населени места во регионот Ретимно, меѓу кои и популарното туристичко место Агија Галини.
Дел од евакуираните се сместени во спортска сала во општината Фестос, додека останатите добиле привремено засолниште во хотели и други безбедни објекти.
Според грчките власти, утринава започнало постепено враќање на дел од туристите во нивните сместувачки капацитети, додека жителите и посетителите од најризичните области сè уште остануваат на сигурни локации. Во меѓувреме, надлежните служби работат на обновување на оштетената електроенергетска и патна инфраструктура.
Пожарот во областа Ситија, на источниот дел од Крит, е ставен под контрола и повеќе не претставува директна закана за населените места. Сепак, пожарникарите остануваат на терен за да ги изгаснат преостанатите жаришта.
На островот Лезбос, во регионот Пломари, во моментов нема активен пожарен фронт, но екипите и натаму дежураат поради опасноста од повторно избувнување на пожарите, предизвикано од силните ветрови.
Портпаролот на грчката противпожарна служба порача дека и покрај големата трагедија, борбата со огнената стихија ќе продолжи.
„Нема да се откажеме. И покрај болката што ја чувствуваме, наш приоритет останува заштитата на граѓаните, туристите и сите посетители“, изјави тој.
Надлежните предупредуваат дека опасноста од нови пожари и денес останува исклучително висока, особено на Крит, каде екстремните временски услови и силниот ветер и понатаму претставуваат сериозна закана.
Веста ја пренесува Serbian.times
