Заменик-министерот за здравство, Јовица Андовски, денеска изрази загриженост за проблемот со нереализирани закажани термини во јавното здравство, што дополнително го оптоварува здравствениот систем.
Тој апелираше до граѓаните кои не можат да ги искористат закажаните термини, да ги откажат навремено – најдоцна до претходниот ден, преку смс порака или со помош на својот матичен лекар. Со ваквото постапување ќе се овозможи термините да ги искористат пациенти на кои итно им се потребни дијагностички процедури, а ќе се намали и бројот на чекања во здравствените установи.
„Само во Скопје, за компјутерска томографија, од вкупно 4.070 закажани термини во изминатиот период, дури 970 пациенти не се појавиле, а притоа не ги откажале своите термини“, нагласи Андовски, истакнувајќи дека тоа претставува над 23 проценти од вкупно закажаните пациенти.
Тој додаде дека ваквата пракса сериозно влијае на достапноста на здравствените услуги и ги повика граѓаните на одговорност и почит кон здравствениот систем.
