На 18 ноември 2024 година, во 13:45 часот, во СВР Битола била поднесена пријава од 60-годишна жена од Битола, која тврди дека била жртва на измама. Според нејзината изјава, таа била измамена за износ од 10.000 евра од лице со кое стапила во контакт преку социјалната мрежа Фејсбук.
Жената објаснила дека пред околу четири месеци започнала комуникација со лицето, кое се претставило како македонски државјанин, вработен во американската армија, кој моментално бил на воена мисија во Сирија. Според нејзиното сведоштво, измамникот ѝ кажал дека има желба да ја прекине мисијата и да се врати, но дека за тоа е потребно да се обезбеди сума од 10.000 евра.
Под изговор дека нема пристап до својата банкарска сметка додека е на терен, тој побарал од неа да испрати пари преку брз паричен трансфер на лице во Турција, уверувајќи ја дека тоа е неопходно за да ја заврши мисијата и да се врати дома. Верувајќи во неговата приказна, жената ја извршила трансакцијата, по што сфатила дека е измамена.
Полицијата презема мерки за целосно расветлување на случајот.
