ОВР Неготино до Основното јавно обвинителство Кавадарци поднесе кривична пријава против Љ.Т. (66) од Неготино, поради сомнение дека извршил кривично дело „демнење“ според член 144-а, став 1 од Кривичниот законик.
Според спроведените истражни мерки и активности од страна на криминалистичката канцеларија при ОВР Неготино, утврдено е дека пријавениот подолг период го следел и прогонувал 41-годишен началник на ОВР Неготино, вмешувајќи се во неговиот личен и приватен живот, како и во животот на неговата сопруга и нивните две малолетни деца.
Како што информира полицијата, пријавениот повеќепати се обидувал да воспостави контакт со оштетениот, со тоа што редовно се појавувал во службените простории на ОВР Неготино и во централното подрачје на градот. Речиси секојдневно го следел неговото движење, доаѓал во ОВР Неготино, го барал, а кога не можел да го најде, го чекал пред неговата канцеларија и пред зградата на ОВР Неготино. Дополнително, го контактирал постојано на мобилниот телефон и објавувал видеа со навредливи содржини на социјалните мрежи, со цел да му нанесе штета на угледот.
Со овие дејствија, пријавениот го извршил кривичното дело за кое е поднесена пријавата, потврдуваат од полицијата.
