Вредни археолошки артефакти, стари речиси 2.500 години, беа пронајдени во регионот на Охрид и Струга. На прес-конференција, на која ексклузивно беа прикажани дел од откритијата, министерот за култура и туризам, Зоран Љутков, истакна дека ова претставува значителен научноистражувачки успех.
Ова откритие не само што нуди нов увид во археолошкото минато на нашата земја, туку и го збогатува европското и светското културно наследство.
„Денеска ја имаме честа ексклузивно да ги претставиме овие вредни артефакти, откриени на археолошки локалитет во Охридско-струшкиот регион. Локалитетот претставува некропола од архајскиот период (6 век пр.н.е.), која по многу нешта потсетува на познатата Требенишка некропола, лоцирана во непосредна близина. Во оваа гробна целина откриени се околу 80 предмети, од кои некои ги презентираме денес. Овие наоди се резултат на најновите археолошки истражувања и ни помагаат да го разбереме животот на древните цивилизации, чија култура продолжува да има значајно влијание врз нашето разбирање на историјата“, изјави министерот Љутков.
