Од 15 ноември стапува на сила обврската за задолжително носење зимска опрема во возилата. Непочитувањето на ова правило, пропишано во Законот за безбедност на патниот сообраќај, ќе резултира со казна од 45 евра во денарска противвредност, односно околу 2.750 денари, како и со можност возилото да биде исклучено од сообраќај.
Под зимска опрема во Македонија се подразбира следново:
- Зимски гуми на сите четири тркала со длабочина на шарата од најмалку 4 милиметри, или
- Летни гуми на сите четири тркала со истата минимална длабочина на шарата, со задолжителни синџири за снег во возилото.
Синџирите за снег се поставуваат на погонските тркала. За возилата со погон на сите четири тркала, условите се:
- Зимски гуми со длабочина на шарата од најмалку 6 милиметри на сите четири тркала, или
- Летни гуми со длабочина на шарата од 4 милиметри, заедно со синџири за снег во возилото.
Ако возилото има постојан погон на сите тркала, синџирите се ставаат на задната осовина. Кај возилата со преклоплив погон, синџирите мора да се постават на оска што е постојано активна.
Автобусите и товарните возила, кои поради технички причини не можат да стават синџири за снег на погонските тркала, мора да бидат опремени со зимски гуми на погонските тркала и да носат прирачен алат, како што е лопата.
Зимските гуми се препознаваат по ознаките „МС“, „М+С“, „М&С“ и по симболот снегулка во стилизирана планина со три врва. Пневматици со клинци не се дозволени во сообраќајот.
