Фото: Принтскрин
Светските лидери денеска му испратија честитки до Доналд Трамп, кандидатот на Републиканската партија, по неговата победа на претседателските избори во САД.
„Честитки за претседателот Доналд Трамп. Подготвен сум да продолжиме соработката, како и во претходните четири години. Со твоите и моите вредности, со почит и амбиција, можеме да придонесеме за поголем мир и просперитет“, напиша францускиот претседател Емануел Макрон на платформата „X“.
Британскиот премиер Кир Стармер, во својата честитка, истакна дека партнерството меѓу Велика Британија и САД ќе продолжи да се развива успешно, изразувајќи надеж за плодна соработка со Трамп во годините што следат.
Италијанската премиерка Џорџа Мелони, во својата порака, нагласи дека Италија и САД се „сестрински нации“.
Претседателката на Европската комисија, Урсула фон дер Лајен, исто така, му упати „топли честитки“ на Трамп, нагласувајќи дека „ЕУ и САД се повеќе од обични сојузници. Нашето партнерство е врзано за народите од двете страни на Атлантикот, кои сочинуваат 800 милиони граѓани. Време е да работиме на силна трансатлантска агенда за доброто на сите нив“, објави таа на „X“.
Премиерот на Северна Македонија, Христијан Мицкоски, му ја честиташе победата на Трамп, истакнувајќи дека таа е доказ за силната верба на американскиот народ во принципите на слободата и демократијата. „Со нетрпение очекуваме да ги продлабочиме нашите силни партнерски односи, особено во областа на безбедноста, економскиот развој и демократските реформи“, изјави Мицкоски.
Претседателот на СДСМ, Венко Филипче, исто така, испрати честитки до Трамп, нагласувајќи дека Социјалдемократскиот сојуз на Македонија му ја честита победата на изборите и му посакува успех во неговиот мандат.
