Според истражувачкиот портал VSquare, унгарскиот премиер Виктор Орбан повторно ќе отвори чувствителни енергетски прашања на средбата со рускиот претседател Владимир Путин. Во фокусот на разговорите се гасот, нафтата, нуклеарната соработка, како и идејата унгарскиот енергетски гигант MOL да преземе дел од сопственоста во српската нафтена компанија НИС.
Новинар на VSquare на платформата X тврди дека Орбан ја договорил претстојната посета на Москва „зад грбот на НАТО-сојузниците“, слично како што направил и минатото лето.
Во неговиот извештај се наведува:
„Орбан со Путин ќе разговара за снабдувањето со гас и нафта, за нуклеарната енергија, како и за потенцијалното учество на MOL во НИС“.
Руските медиуми веќе објавија дека средбата меѓу двајцата лидери започнала. На состанокот, покрај Путин, присуствуваат и неговиот помошник Јуриј Ушаков, вицепремиерот Александар Новак и министерот за надворешни работи Сергеј Лавров.
Според РИА Новости, по разговорите не е планирано официјално обраќање до медиумите.
