Седумгодишниот шахист Јован Јовановски, кој е член на градскиот шаховски клуб во Куманово, ќе ја претставува Македонија на светското младинско првенство во шах, кое ќе се одржи во Италија од 14 ноември. Тој ќе учествува заедно со уште двајца шахисти од Струмица, информираа од клубот.
Јовановски е ученик во Основното училиште „Христијан Карпош“ и започнал да игра шах кога имал пет години. Заедно со својот тренер, Јовановски вежба околу три часа дневно и очекува успешен настап на светското првенство.
„Постојано тренирам, играјќи дома, во клубот и на натпревари. Досега имам освојувано единаесет медали и еден пехар. Ова е мојот втор настап на светско првенство, овој пат во Италија“, вели Јовановски.
