По затворањето на гласачките места и по првичните резултати од вториот круг на локалните избори, лидерот на ВМРО-ДПМНЕ, Христијан Мицкоски, прогласи значајна победа за коалицијата предводена од неговата партија.
„Ова е победа на народот, на вербата и надежта за подобра иднина. Македонија покажува зрелост, а Орце победи убедливо во Скопје“, изјави Мицкоски додека присутните скандираа: „Цело Скопје ВМРОвски град!“.
Лидерот на партијата истакна дека победата се проширила и во Карпош, Аеродром и Чучер Сандево, при што напомена дека во некои општини изборната борба била особено изразена „во последен момент“.
Особено се осврна на резултатот во Кичево: „Падна митот дека градот припаѓа на одредени групи. Народот се обедини против недомаќинско управување – Македонци, Албанци, Бошњаци, Роми, Срби, Власи, Турци, христијани и муслимани работевме заедно. Ова е порака дека можеме да се обединиме околу вредности, а не поделби.“
Мицкоски додаде дека времето на „локални шерифи“ е завршено и дека победата е јасна порака против нечесните политички игри.
„Не славиме против никого, туку за Македонија и новата енергија што ја носат овие избори. Пораката е примена и разбрана“, заклучи тој.
