Во утринските часови во романскиот главен град Букурешт се случи силна експлозија во станбена зграда, при што животот го загубија најмалку три лица, а 17 се повредени. Меѓу загинатите, според локалните медиуми, е и бремена жена.
Сведоци и медиуми известуваат дека два ката од зградата се целосно урнати, додека други делови се оштетени. Прозорците на блиското средно училиште исто така се скршени. Детонацијата била толку моќна што се почувствувала и во околните згради.
Според неофицијални информации, експлозијата можела да биде предизвикана од истекување на гас, кое наводно е активирано од еден од станарите, иако претходно било исклучено. Оваа информација сè уште не е официјално потврдена.
Романската гасна компанија „Дистригаз“ била алармирана рано утрово поради мирис на гас, но до нивното пристигнување експлозијата веќе се случила.
Станарите се евакуирани и засега не им е дозволено да се вратат во своите домови поради опасност од понатамошно рушење. Евакуирани се и учениците и наставниците од соседната гимназија.
ПОГЛЕДНЕТЕ ГО ВИДЕОТО ТУКА
фото:
