САРДИНИЈА – Италијанскиот остров Сардинија, познат по својата природна убавина и историска култура, се соочува со сериозен демографски проблем – намалувањето на бројот на постојани жители. Иако островот привлекува многу туристи, бројот на луѓето кои живеат тука цело време непрекинато опаѓа. Во последните три децении, населението се намалило од 1,64 на 1,57 милиони, а половина од жителите живеат во двата најголеми града. Помалите населби, пак, полека се празнат.
Главниот фактор за ова е низоката стапка на наталитет. Со просек од само 0,91 дете по жена, Сардинија бележи најниска стапка на раѓање во Италија, земја која и сама е меѓу најмалку плодните во Европската унија. За да се одржи стабилно население, секоја жена би требало да роди барем 2,1 дете.
Невработеноста и ограничените економски можности ги тераат младите да заминуваат од селата.
„Последното дете во нашето село беше родено пред десет години“, вели Марија Ана Камеда, градоначалничка на Барадили, најмалото село на островот со само 76 жители. Селото е мало, но уредно и добро одржувано. Основното училиште се затворило пред повеќе од три децении, а денешните деца од околните села секое утро патуваат со бесплатен автобус до најблиското училиште. Средното училиште и болницата се на повеќе од 30 километри оддалеченост.
За да ја поттикнат миграцијата во руралните населби, локалните власти нудат финансиски и други стимулации. Брачни парови кои ќе се преселат во село со помалку од 3.000 жители можат да добијат:
- До 15.000 евра за купување или реновирање куќа.
- До 20.000 евра за започнување бизнис.
- Месечна поддршка од 600 евра за првото дете и 400 евра за секое следно дете до петгодишна возраст.
Некои населби, како Ололаи, нудат куќи за само 1 евро. Сепак, странците сè уште ретко доаѓаат на островот – нивниот удел е само 3,3%, додека просекот во Италија е 8,9%. Владата на Ѓорѓе Мелони веќе најави планови за увоз на 500.000 работници од странство во наредните три години.
Проектот во Ололаи започнал во 2016 година и наишол на голем интерес – околу 100.000 луѓе аплицирале, но само мал број странци всушност добиле куќа. Селото сè уште бележи опаѓање, и покрај иницијативата.
