Фото: Принтскрин
На Универзитетската клиника за неврохирургија успешно е изведена сложена микрохируршка операција кај пациент на возраст од 57 години, кај кого била дијагностицирана руптурирана аневризма на мозочен крвен сад.
Станува збор за интервенција со примена на современа и напредна техника што им овозможува на лекарите во реално време да го следат протокот на крв низ мозочните артерии за време на самата операција. Со тоа значително се зголемува прецизноста на хируршката постапка и се намалува ризикот од компликации.
„Станува збор за операција која за првпат во Македонија е изведена со примена на интраоперативна флуоресцентна видеоангиографија. Оваа иновација е значаен чекор напред во модернизацијата на македонското здравство. Примената на интраоперативната флуоресцентна видеоангиографија ја зголемува безбедноста на пациентите и ја подобрува ефикасноста на хируршките интервенции“, вели министерот за здравство, Азир Алиу.
