Убиецот на Росица од Велес уште пред повеќе од една деценија бил пријавуван во скопските полициски станици. Според информации на Хелсиншкиот комитет, до нив стигнале пријави од најмалку четири девојки кои од 2013 година наваму укажувале дека истиот човек, по раскинување на врските, продолжувал да ги следи, вознемирува и им испраќа навредливи пораки, дури и за нивните најблиски.
Една од нив за „Слободен печат“ сведочела дека во периодот 2013–2014 била изложена на постојана тортура во врската со Илија. Таа раскажала дека не можела да се ослободи од него, а тој ја уценувал дека ќе си го одземе животот ако не се врати кај него.
На социјалните мрежи излегоа нови сведоштва за Илија Стефановски, во кои се опишува неговото долгодишно однесување исполнето со вознемирување и понижување на поранешни партнерки.
Се наведува и дека, иако се претставувал со раскошен начин на живот, всушност ги продал и потрошил становите и куќите што ги имал, само за да го одржи имиџот кој го градел пред јавноста.
