Велика Британија испраќа „тајфуни“ на помош во Полска по инцидентите со Русија

Велика Британија ќе испрати свои борбени авиони „Еврофајтер Тајфун“ за патролирање на полскиот воздушен простор, откако Варшава ја обвини Русија за сериозни прекршувања на границата со употреба на беспилотни летала, соопшти британскиот премиер Кир Стармер.

Според владината изјава, во следните денови британските Тајфуни ќе се приклучат на француските „Рафал“, германските „Еврофајтер“ и данските „Ф-16“ како дел од заедничката НАТО-мисисја „Источен стражар“. Мисијата има за цел да го зајакне воздушното набљудување и да обезбеди брза реакција на потенцијалните закани од Русија.

Британските авиони ќе полетуваат од базата Конингсби, во источниот дел на Англија, со поддршка од танкерот „Војаџер“ за дополнително полнење гориво во воздух. Главната задача на овие патроли ќе биде следење на сите воздушни активности кои се сметаат за закана, вклучувајќи и беспилотни летала, како дел од напорите на НАТО за одржување на стабилноста и безбедноста во источна Европа.