Премиерот Христијан Мицкоски денеска најави дека Владата разгледува можност идното зголемување на платите да се врзува со растот на продуктивноста. „Во иднина планираме примањата да се зголемуваат паралелно со продуктивноста, со цел да се избегне неконтролирана инфлација“, изјави тој во Штип, по презентацијата на новата воена опрема од САД.
Мицкоски призна дека таквиот пристап може да предизвика политички незадоволства, но, според него, подобро е тие последици да се почувствуваат сега, отколку граѓаните да трпат висока инфлација на долг рок. Тој потсети дека јулската инфлација во земјава изнесувала 4,8% на годишно ниво, што е во рамките на просекот во регионот.
Говорејќи за факторите што ја поттикнуваат инфлацијата, премиерот посочи дека најголем притисок доаѓа од секторот на услугите, каде цените во одредени области пораснале за над 20%. Владата, според него, има ограничени можности за интервенција, но ќе продолжи со мерки како што е ограничување на трговските маржи за училишен прибор и други потреби пред почеток на учебната година.
Мицкоски нагласи дека ад-хок ограничувањето на маржи не е трајно решение и отвора прашања за одржливоста на пазарната економија. Сепак, тој предупреди дека нема да се толерираат злоупотреби од страна на одредени синџири маркети и најави дека Комисијата за заштита на конкуренцијата, која е кадровски зајакната, наскоро ќе спроведе контроли и санкции за скриени маркетинг практики.
Во однос на услугите, премиерот додаде дека Владата нема директна можност да го регулира ценовникот на ресторани, кафулиња или транспортни компании, но и тука ќе се разгледуваат можни мерки.
„Поврзувањето на продуктивноста со растот на личните доходи е поопфатен пристап кој, на среден рок, очекуваме да даде значајни резултати“, заклучи Мицкоски.
