Синоќа низ Србија повторно избувнаа протести проследени со тензии и низа инциденти. Во Белград, во близина на зградата на Генералштабот, поддржувачи на владејачката Српска напредна партија (СНС) испукуваа пиротехнички средства кон жандармеријата и кон собраните граѓани. Слични сцени беа забележани и на други локации во главниот град, како и во Нови Сад и уште неколку градови, каде полицијата употреби солзавец за растерување на демонстрантите.
Меѓу повредените е и Пеѓа Митровиќ, пратеник кој тврди дека бил нападнат од седум до осум маскирани лица. „Се нафрлија врз мене без никаква причина. Кога им реков дека сум пратеник, одговорија дека тоа не ги интересира и почнаа брутално да ме удираат по главата и нозете со шипки“, изјави тој
Митровиќ вели дека нападот бил придружен со навреди и малтретирање. „Сфатив дека работата може да заврши многу лошо, па се засолнив и избегав. Очигледно имав работа со луѓе кои изгубиле контрола“, додаде тој.
Пратеникот ја обвини власта дека стои зад насилството: „Ова е директен резултат на политиката на режим кој тоне во агресија. Кога државата дозволува хулигани блиски до СНС да тепаат мирни граѓани, тоа е доказ за нејзин колапс. Ова не смее да биде Србија на Вучиќ. Диктатор на крајот на својата моќ е подготвен да примени најжестоко насилство, но нема да избега од одговорност“.
Најтешкиот судир синоќа се случи на улицата „Кнез Милош“, каде полицијата уапси повеќе лица откако од блиска оддалеченост беа испукани пиротехнички средства кон демонстрантите. По полноќ, атмосферата во Белград и другите градови остана напната, со силно полициско присуство, иако тензиите беа нешто намалени во однос на претходните часови.
