Тешка воздухопловна несреќа ја потресе Србија утрово, откако воен борбен авион МиГ-29 на српската армија се урна во близина на Стара Пазова, недалеку од Белград. Според информациите што ги објави Радио-телевизија Србија (РТС), пилотот го загубил животот во падот на леталото.
Несреќата се случила на земјоделска површина меѓу Стара и Нова Пазова, каде што авионот завршил по засега неразјаснети околности. Станува збор за летало кое било дел од 204. воздухопловна бригада на Војската на Србија, чија база се наоѓа на воениот аеродром Батајница.
Веднаш по несреќата, на локацијата биле испратени бројни итни служби. Во акцијата учествуваат припадници на српската армија и воената полиција, полициски екипи, пожарникари и медицински тимови.
Фотографиите што се појавија во српските медиуми сведочат за сериозноста на инцидентот. На нив се забележуваат делови од уништеното летало зафатени од оган, додека над местото на несреќата се издига густ облак од црн чад.
Причините поради кои дошло до падот засега остануваат непознати. Надлежните институции сè уште немаат соопштено официјални детали за околностите под кои се случила трагедијата, ниту за тоа што довело до фаталниот исход.
Се очекуваат повеќе информации од српското Министерство за одбрана, како и детали од истрагата што треба да ги утврди причините за несреќата.
Веста ја пренесува 192_rs.



