Мерките за забрана на приближување и претходните пријави за насилство не спречија трагичен исход. Обвинителството истражува, а се очекуваат резултатите од обдукцијата.
Познати се идентитетите на двете лица кои ги загубија животите во трагичниот настан кај Богданци, пренесува Skopje1. Станува збор за 17-годишната Билјана Кириќ и 21-годишниот Виктор Гунтаров. Според првичните сознанија на Обвинителството, случајот се истражува како убиство и самоубиство, но конечните околности ќе бидат утврдени по завршувањето на истрагата.
Она што особено ја вознемирува јавноста е фактот што трагедијата се случила и покрај претходните пријави за насилство и постапките што се воделе против Гунтаров. Како што пренесува Skopje1 на девојката ѝ биле загрозувани сигурноста и безбедноста, а надлежните институции веќе постапувале по пријавените случаи.
Според информациите од Министерството за внатрешни работи, на 30 септември, околу 21 часот, полицијата добила пријава дека 21-годишникот физички ја нападнал својата малолетна партнерка во неговиот семеен дом. По пријавата, тој бил приведен, а за случајот бил известен и јавен обвинител.
Но, ова не била единствената пријава. На 16 октомври, Основното јавно обвинителство во Гевгелија примило нова пријава за загрозување на сигурноста на девојката. По неа започнала постапка, биле преземени процесни дејствија, а биле издадени и наредби за потребни вештачења.
Во меѓувреме, во посебна судска постапка биле определени мерки за заштита од насилство. Со нив на Гунтаров му било забрането да ѝ се приближува на девојката и да ја вознемирува. Според досегашните информации, овие мерки биле активни и во периодот кога се случила трагедијата.
Според информации објавени од Skopje1, Гунтаров наводно ја пресретнал Билјана пред теретана во Гевгелија, по што со сила ја внел во автомобилот и се упатил кон Богданци. Овие наводи засега немаат официјална потврда од надлежните органи и се предмет на проверка.
Страшниот настан бил откриен на 3 ноември, околу 18:40 часот, кога во полицијата пристигнала пријава за запалено возило на локацијата „Ичева чешма“, во месноста Горно Село кај Богданци.
Полициските екипи веднаш се упатиле на местото. Таму било пронајдено тело на 21-годишен маж надвор од автомобилот, додека по локализирањето на пожарот во внатрешноста на возилото било забележано и друго, опожарено тело.
Од Основното јавно обвинителство Гевгелија потврдија дека јавен обвинител извршил увид на местото на настанот и издал наредби за прибирање и обезбедување докази.
Како дел од истражната постапка, телата на починатите се предадени на обдукција, а обезбедени се и снимки од видеонадзор кои треба да помогнат во утврдувањето на движењето и случувањата пред трагедијата.
Првичните индиции укажуваат на убиство и самоубиство, но од Обвинителството нагласуваат дека случајот ќе биде целосно расветлен и дека сите околности ќе бидат предмет на истрага.
Резултатите од обдукцијата и анализата на материјалните докази треба да дадат одговори за точната причина и начинот на смртта, како и за настаните што ѝ претходеле.
Случајот во Богданци повторно ја стави во фокус ефикасноста на системот за заштита од семејно и партнерско насилство. Особено сериозно е прашањето како дошло до ваков трагичен исход во ситуација кога претходно биле пријавувани насилство и закани, а биле изречени и судски мерки за забрана на приближување.
Јавноста сега очекува целосно расветлување на случајот, но и одговор дали сите институции постапиле навремено и дали можело да се спречи трагичниот крај.
Веста и фотографиите ги пренесува Skopje1.mk
