Видео на кое се прикажуваат странски ловци во лов на диви животни во подрачјето на Маврово повторно ја отвори темата за начинот на кој се спроведуваат ловните активности во националниот парк.
На снимката, покрај ловците, се гледа и возило со ознаки на Националниот парк „Маврово“, а особено внимание привлече моментот во кој се забележува консумирање крв од дива коза. Видеото првично било објавено во октомври минатата година, но неговата содржина сега предизвика реакција од организацијата „Еко свест“.
Од организацијата побараа надлежните институции итно да го разгледаат случајот и да преземат соодветни мерки.
Од Националниот парк, пак, наведуваат дека отстрелот не се спроведува произволно, туку е дел од програма за одгледувачки мерки, која е одобрена од надлежните министерства. Директорот на паркот, Харис Ибраими, посочува дека станува збор за однапред определени единки, чиј отстрел се врши и со цел следење на здравствената состојба на дивечот и одржување на животинските популации.
Според објаснувањето, ловните друштва при ваквите активности треба да имаат придружба од ренџер на националниот парк.
„Еко свест“ во меѓувреме инсистира Владата и Министерството за животна средина да ја финализираат постапката за повторно прогласување на Маврово за национален парк.
Организацијата бара, до завршувањето на постапката, да се воведе мораториум на активности за кои смета дека се спротивни на целите за заштита на природата.
Од „Еко свест“ предупредуваат и на недостигот од важни документи поврзани со управувањето и заштитата на подрачјето. Маврово има големо значење за биолошката разновидност, а меѓу видовите кои живеат таму е и балканскиот рис, кој се смета за критично загрозен.
Веста ја пренесува Podzemje.mk
