Зголемен број деца последните денови побарале лекарска помош во Клиничката болница во Тетово, каде што педијатрите за само 48 часа прегледале 139 мали пациенти.
Од нив, 12 деца биле задржани на болничко лекување поради потребата од дополнителен медицински надзор и терапија, додека останатите по прегледот биле пуштени на домашно лекување.
Најголем дел од пациентите имале симптоми како покачена телесна температура, повраќање и дијареја. Лекарите оценуваат дека во најголем број случаи станува збор за вирусни инфекции, кои почесто се појавуваат во летниот период.
Педијатарот д-р Иса Османи посочува дека високите температури се еден од факторите што може да влијаат врз појавата на ваквите тегоби. Ризикот дополнително се зголемува при несоодветна подготовка или чување на храната, особено кај најмалите деца кои се хранат со адаптирано млеко.
Како дополнителен фактор се наведува и меѓусебниот контакт меѓу децата, особено кога едно од нив веќе има симптоми на инфекција.
Од педијатриското одделение апелираат родителите да бидат внимателни, но и да не паничат при секоја појава на повраќање или дијареја. Особено важно е детето редовно да внесува течности и електролити, со цел да се спречи дехидрација.
Лекарите советуваат зголемено внимание на хигиената при подготовката на оброците, правилното чување на храната и редовната хидратација на децата. Се препорачува и избегнување близок контакт со деца кои покажуваат знаци на инфекција.
Зголемениот број прегледи во тетовската педијатрија е уште еден сигнал родителите во летниот период особено да внимаваат на здравјето, хидратацијата и исхраната на најмладите.
Веста ја пренесува Skopje1.mk
