Наместо мирна хотелска ноќ, ја дочекало непријатно утро – црвени дамки, силно чешање и инсекти скриени во постелнината.
Хана Стивенсон, 31-годишна блогерка за патувања од Кембриџшир, тврди дека по една ноќ помината во хотел на „Travelodge“ во Англија се разбудила со голем број убоди по телото.
Таа престојувала во објектот на „Newmarket Road“ во Кембриџ на 26 јули, по излегување со пријателка. Утрото почувствувала силно чешање и забележала необични црвени промени на кожата, особено на рацете.
Откако решила внимателно да ја провери постелнината, ситуацијата станала уште понепријатна. На перницата забележала траги што личеле на крв, како и мали црни точки. При поблиска проверка, според нејзиното сведоштво, забележала и бубачка.
Хана првично изброила 37 убоди само на левата рака, но во текот на денот почнале да се појавуваат нови траги на градите, грбот, лицето, нозете и другите делови од телото. Таа проценила дека вкупниот број бил над 100. Потоа, според нејзиното сведоштво, открила и стеници во постелнината.
Откако повторно ја проверила постелнината, Хана тврди дека пронашла уште стеници.
„Се разбудив со чувство дека нешто ме чеша и почнаа да ми се појавуваат отоци на рацете. Кога станав, видов траги на перницата и црни точки. Кога погледнав подобро, видов и бубачка“, раскажала таа.
Според Хана, појавата на нови убоди продолжила во текот на денот. Таа се обратила на рецепцијата при одјавувањето, по што, како што тврди, била упатена да контактира со службата за корисници. Ѝ било кажано и дека собата нема да биде повторно издадена истата вечер.
Хотелската компанија подоцна потврдила дека во собата навистина биле пронајдени стеници односно мали паразити, иако нагласила дека ваквите случаи се исклучително ретки. Од компанијата велат дека собите редовно ги проверуваат обучени членови на персоналот, а по инцидентот биле преземени дополнителни мерки и обука на вработените.
Во меѓувреме, Хана добила терапија со стероидна крема и антихистаминици. Таа објавила видео со фотографиите од кожата, кое на интернет собрало повеќе од 76.000 прегледи.
Последиците од убодите не биле само физички.
На 5 август, Хана требало да присуствува на свадбата на својот братучед, но поради трагите на рацете и другите делови од телото морала да користи шминка за да ги прикрие.
Наместо облеката што првично ја планирала, избрала фустан со долги ракави за да сокрие што е можно поголем дел од црвенилото.
Таа вели дека особено ѝ било непријатно поради тоа што убодите се гледале и на рацете, каде што тешко можела да ги прикрие.
„Лето е и воопшто не е лесно да ги сокриете. Постојано размислував дали некој ќе ги забележи рацете“, раскажала таа.
Иако отокот постепено се намалил, трагите сè уште биле видливи. Хана вели дека ситуацијата ѝ предизвикала голема вознемиреност и дека дури и неколку дена подоцна продолжила да чувствува чешање.
Таа, исто така, признава дека искуството влијаело врз нејзината доверба во хотелското сместување.
„Сум патувала низ Африка и Јужна Азија и никогаш немав ваков проблем. А сега ми се случи во мојот роден град“, вели таа.
Хана додава дека во иднина многу повнимателно ќе ги проверува хотелските оценки и искуствата на другите гости пред да резервира сместување.
Од „Travelodge“ изразиле жалење поради непријатното искуство и нагласиле дека безбедноста на гостите им е приоритет.
Компанијата објаснила дека појавата на стеници е проблем со кој се соочува поширокиот хотелски сектор и дека нивното присуство не значи нужно дека просторот е нечист или дека не се одржува хигиена.
Од хотелскиот синџир велат дека кога ќе биде пријавен ваков проблем, засегнатата соба, како и околните соби, се повлекуваат од употреба за да бидат проверени и третирани од стручни служби за контрола на штетници.
Компанијата потврдила дека директно ѝ се извинила на Хана и дека случајот бил решен со неа.
Сепак, за 31-годишната блогерка непријатноста не завршила со напуштањето на хотелот. Покрај физичките реакции на кожата, таа вели дека целото искуство оставило и психолошка трага и дека отсега ќе биде многу повнимателна при изборот на хотел.
Веста ја пренесува Ladbible.com
