Тажна вест го потресе туристичкиот сектор во земјава. Почина Мирослав Чоневски – Грк, долгогодишен туристички работник и сопственик на познатата скопска туристичка агенција „Игуана“.
Чоневски со децении беше дел од македонскиот туризам и се сметаше за еден од луѓето кои оставија значаен белег во развојот на туристичката дејност. Неговото име беше добро познато меѓу колегите, соработниците, пријателите и бројните патници кои со години ги користеа услугите на „Игуана“.
Од туристичката агенција се простија од својот долгогодишен лидер со емотивна порака, во која го опишаа како човекот кој ја поставил насоката и оставил трага врз генерации туристички работници.
„Го загубивме кормиларот, но не и компасот“, порачаа од „Игуана“, заблагодарувајќи му за идејата, посветеноста и годините што ги поминал со својот тим.
Од Националната асоцијација на туристички агенции, пак, изразија длабоко жалење за загубата на нивниот долгогодишен колега и истакнаа дека неговиот придонес кон туристичкиот сектор ќе остане запаметен.
Веста за неговата смрт предизвика бројни реакции и на социјалните мрежи. Пријатели, колеги и познаници се збогуваат со Чоневски, опишувајќи го како препознатлива скопска фигура и човек кој со својот карактер и работа оставил траен печат.
Со неговото заминување, македонскиот туризам загуби еден од своите долгогодишни и препознатливи имиња.
Веста ја пренесува Newz24live.com
