Македонија остана без една од своите највпечатливи личности. На 103-годишна возраст почина д-р Никола Стојановски – истакнат педијатар, борец од Народноослободителната борба и човек кој со децении беше дел од најважните историски и општествени процеси во државата.
Стојановски ќе остане запаметен како првиот претседавач со повеќепартиското Собрание на Македонија на конститутивната седница одржана на 8 јануари 1991 година. Како највозрасен пратеник во тогашниот парламентарен состав, тој ја раководеше седницата сè до изборот на Стојан Андов за претседател на Собранието.
Покрај неговата значајна улога во политичкиот живот, д-р Стојановски беше еден од најценетите педијатри во земјата, оставајќи длабока трага во здравствениот систем преку својата долгогодишна лекарска кариера.
Неговиот живот беше обележан и со активното учество во Народноослободителната борба, а важеше и за последниот жив партизан од тој период. Уште како ученик бил дел од штрајкот на велешките гимназијалци во март 1942 година, организиран како протест против воведувањето на бугарскиот јазик во наставата.
Во текот на својата јавна дејност, д-р Никола Стојановски со години ја извршуваше и функцијата претседател на Сојузот на борците, посветувајќи се на зачувување на историското наследство и вредностите за кои се залагаше во текот на целиот свој живот.
Веста ја пренесува Skopje1.mk
