Поранешниот српски кошаркарски репрезентативец Милан Гуровиќ покажа присебност и храброст, спасувајќи живот на возач чиј автомобил се запалил на улица во Белград.
Според информациите, Гуровиќ се движел со својот автомобил кон дома кога забележал возило кое ненадејно ја сменило насоката и запрело покрај патот, на само неколку метри од него.
Само неколку моменти подоцна од автомобилот почнале да излегуваат пламен и чад. Без двоумење, поранешниот кошаркар притрчал кон возилото и успеал навреме да го извлече возачот на безбедно место.
Очевидците велат дека реакцијата била пресудна, бидејќи за помалку од една минута автомобилот бил целосно проголтан од огнот.
„Сѐ се случуваше многу брзо. Да задоцнеше само неколку секунди, последиците ќе беа трагични. Гуровиќ постапи храбро и решително, спасувајќи човечки живот“, изјавиле сведоци на настанот.
Неговиот потег предизвика бројни позитивни реакции во јавноста, а многумина го нарекоа вистински херој поради несебичната и навремена интервенција.
Веста ја пренесува Kurir.rs
