Светот на фудбалот остана без едно од најголемите имиња во својата историја. Франко Барези, иконата на Милан и еден од најдобрите дефанзивци што ги дала Италија, почина на 66-годишна возраст.
Барези остави неизбришлива трага во црвено-црниот дрес и со години беше вистински лидер на тимот од „Сан Сиро“. Во својата богата кариера, која целосно ја помина во Милан, од 1978 до 1997 година, легендарниот стопер одигра 719 натпревари и стана дел од најславните моменти во историјата на клубот.
Со Милан освои шест шампионски титули во Серија А, три европски купови на шампиони, три европски Суперкупа и два Интерконтинентални трофеи. Неговата посветеност и верност кон клубот беа симболично наградени по пензионирањето, кога дресот со број шест беше повлечен и повеќе никогаш не беше доделен на друг фудбалер.
Интересно е што како млад фудбалер Барези бил приврзан кон градскиот ривал Интер, но таму не добил шанса. Милан веднаш го препознал неговиот огромен потенцијал и му овозможил да изгради кариера која засекогаш ќе остане запишана во историјата.
Во репрезентативниот дрес на Италија настапи 81 пат. Беше дел од тимот кој ја освои светската титула во 1982 година, а на Мундијалот во 1994 година ја имаше капитенската лента и ја предводеше „аѕурната“ селекција до финалето во САД.
Еден од најемотивните моменти во неговата кариера се случи токму во финалето против Бразил, кога по промашениот пенал во серијата удари остана во солзи. Таа сцена и денес е една од највпечатливите слики во историјата на Светските првенства.
Во последните години Барези се соочуваше со здравствени предизвици. Беше подложен на операција поради проблеми со белите дробови, но и покрај тоа остана тесно поврзан со Милан и често беше присутен на трибините на „Сан Сиро“.
Неговото име ќе остане синоним за верност, лидерство и фудбалска класа. Франко Барези не беше само капитен на Милан — тој беше симбол на една ера.
Веста ја пренесува Слободен печат.
