Жителите на кумановското село Љубодраг јавно се обратија до надлежните институции, барајќи побрза реакција и поголема транспарентност во врска со настан што, според нив, сериозно ја нарушил безбедноста во селото.
Според исказите на повеќе жители, во последните неколку дена непознато лице наводно се движело низ селото и влегувало во приватни дворови и куќи, при што постоел сомнеж дека целта била извршување кражби. Очевидци тврдат дека лицето било со повисок раст, носело капуљача, а кај себе имало и голем нож. Дел од мештаните велат дека успеале да направат фотографии од осомниченото лице, но и покрај тоа што случајот бил пријавен, тоа успеало да се оддалечи.
Жителите велат дека стравот меѓу населението е сè поголем, особено затоа што во селото живеат многу повозрасни лица, деца и семејства кои се чувствуваат несигурно.
„Не сакаме секој ден да живееме во неизвесност и страв дека некој повторно ќе се обиде да влезе во нашите домови. Очекуваме институциите да преземат сè што е потребно за да се врати чувството на сигурност“, порачуваат мештаните.
Тие бараат од Министерството за внатрешни работи да ја информира јавноста дали се преземаат конкретни активности, до каде е истрагата и дали има нови сознанија што би помогнале во пронаоѓањето на лицето.
Мештаните потенцираат дека нивниот апел не е насочен кон ширење паника, туку кон добивање навремени и официјални информации, како и уверување дека заштитата на граѓаните останува приоритет.
Воедно, тие ги повикуваат медиумите да го пренесат нивниот повик, а надлежните институции редовно да ја известуваат јавноста за текот на постапката и за мерките што се преземаат со цел повторно да се воспостави чувството на безбедност во селото.
Веста ја пренесува Podzemje.mk
