Најмалку петмина загинаа, а голем број објекти се оштетени по силниот земјотрес што го погоди централниот дел на Перу. Потресот, чија конечна магнитуда беше утврдена на 5,1 степен според Рихтеровата скала, предизвика значителна материјална штета и паника меѓу населението.
Земјотресот имал епицентар во провинцијата Чупака, во регионот Хунин, на длабочина од околу 22 километри. Во првите извештаи беше наведено дека магнитудата изнесувала 5,6 степени, но по дополнителните анализи таа беше ревидирана на 5,1.
Локалните власти информираа дека десетици куќи се целосно или делумно уништени. Меѓу оштетените објекти е и историскиот крст „Господарот Каникруз“, стар приближно пет века, кој се урнал под силата на потресот.
По земјотресот, бројни жители побарале итна помош од спасувачките и надлежните служби, додека екипите продолжуваат со проценка на штетите и расчистување на погодените подрачја.
Освен човечките жртви, погодени се и домашни животни, од кои дел останале затрупани под урнатините на оштетените објекти.
Тресењето на земјата се почувствувало и во главниот град Лима, како и во градот Хуанкајо, каде жителите накратко ги напуштиле домовите и работните места од страв од нови потреси.
Веста ја пренесува Skopje1.mk
Видео: Metro.co.uk
