Фото: Принтскрин
Основниот кривичен суд Скопје ја објасни причината за ослободителната пресуда за поранешниот премиер Никола Груевски во случајот „Талир 2“. Според Судот, одлуката не произлегува од поинакво толкување на доказите, туку од измените на Кривичниот законик кои стапија во сила во 2023 година.
Од Кривичниот суд информираат дека по промените во законската регулатива, обвинението било изменето и случајот продолжил да се разгледува како можна злоупотреба на службената положба и овластување. Во однос на Кирил Божиновски, постапката била запрена поради истек на законскиот рок за гонење.
Во судското образложение се наведува дека измените во Кривичниот законик значително ја сменија правната рамка за делото за кое се водеше постапката. Одредени дејствија кои претходно биле опфатени со обвинението веќе немале исто правно значење, поради што обвинителството морало да го приспособи случајот кон новите законски одредби.
Сепак, судскиот совет оценил дека со новото обвинение не биле обезбедени дополнителни докази кои би ги потврдиле новите елементи потребни за постоење на кривично дело. Според нив, материјалите во предметот останале непроменети во однос на претходната постапка, но по измените на законот тие не биле доволни за донесување осудителна одлука.
Од Судот посочуваат дека обвинението не било докажано на ниво потребно за кривична одговорност, односно не било утврдено дека обвинетиот постапил со пречекорување на службените овластувања или со непостапување во рамки на службените обврски.
Кривичниот суд дополнително нагласи дека фактичката состојба и доказите не биле причина за ослободувањето, туку промените во законските правила според кои предметот морал повторно да се оценува.
Со оваа одлука продолжува правната разврска на предметот „Талир 2“, а странките имаат можност да поднесат жалба до Апелациониот суд.
Веста ја пренесува Skopje1.mk
