Силното невреме што попладнево го зафати Скопје предизвика бројни проблеми во сообраќајот и на повеќе локации низ градот. Еден автомобил остана заглавен во подвозникот кон Бутел, откако големо количество вода го поплави коловозот и го оневозможи неговото понатамошно движење.
Покрај овој случај, граѓаните преку социјалните мрежи пријавуваат штети и во други делови од главниот град. Според нивните информации, силниот ветер урнал дрвја и оштетил делови од фасади во Центар, Дебар Маало, Ченто, Капиштец, Лептокарија и Карпош 4. Во неколку случаи, паднатите дрвја предизвикале оштетувања и на паркирани автомобили.
Дополнителни потешкотии создава и нефункционирањето на семафорите кај булеварот „Борис Трајковски“ и на крстосницата кај „Раде Кончар“, поради што сообраќајот се одвива отежнато.
Критична е состојбата и на делницата од Континентал кон Бит Пазар, каде што водата се задржува на коловозот. Кај пешачкиот мост во близина на Бит Пазар, според сведоштва на граѓани, водата се прелева преку патот и ги заплискува возилата кои се движат кон Центар.
Надлежните служби се на терен и работат на санирање на последиците од невремето. Во меѓувреме, до возачите се упатува апел да возат внимателно, да ја намалат брзината и, доколку е можно, да ги избегнуваат поплавените подвозници и останатите критични сообраќајници.
Веста ја пренесува Skopje1.mk
