Благодарение на снимките од медиумите oд опожарените места, особено од тие што се подалеку од погледот од урбаните средини во нашата прекрасна природа, граѓаните можат да видат со какви екстремни услови и предизвици се соочуваат пожарникарите и сите други служби вклучени во гаснењето на пожарите на отворен простор. Познато е дека „Една фотографија кажува повеќе од илјада зборови“ од терен, па денес граѓаните веќе подобро ја осознаваат преку видео и фото запис пренесени од медиумите исцрпувачката и опасна борба против огнените стихии што секојдневно ја водат пожарникарите и надлежните служби и институции во исклучително тешки услови.
Јавноста има право да поставува прашања и да бара одговорност, но исто така заслужува да ја види и реалната состојба на терен. Зад секоја фотографија или видео од изгорена шума стои напорен ангажман на луѓе коишто ризикуваат сопствени животи во обид да ја спасат македонската природа, домовите, викендичките, земјоделските површини и имотот на граѓаните. Евидентно е дека благодарение на медиумите тоа веќе не е непознаница или ретко видена работа.
Стрмни и непристапни планински терени, високи температури, густ чад, силен ветер и огнени линии долги стотици метри, а во одредени случаи и со километри, се само дел од предизвиците со коишто тие се борат со часови, а неретко и со денови, без прекин, се дури се може и се додека дозволуваат условите.
Апел до граѓаните: Бидете совесни и одговорни, почитувајте ги препораките за спречување пожари на отворено и секој забележан пожар веднаш пријавете го до надлежните служби на 112.
Во продолжение погледнете ги фотографиите и видеата од терен:
