Подружницата ХЕС „Црн Дрим“ при АД ЕСМ започна со редовната акција за отстранување на речните реси од коритото на реката Црн Дрим во Струга. Активностите се спроведуваат по целата должина на реката низ градот, со цел да се зачува нејзиниот природен изглед и да се обезбеди почиста животна средина.
Од АД ЕСМ информираат дека, иако ваквите активности не се нивна законска обврска, тие веќе подолг временски период доброволно ја организираат и финансираат оваа акција како дел од нивната грижа за Струга и нејзината околина.
По успешно завршената тендерска постапка и изборот на специјализирана компанија за расчистување на речното корито, работите на терен официјално започнаа денес. Според најавите, чистењето треба да биде завршено најдоцна до 3 јули.
Од компанијата посочуваат дека крајот на јуни е најсоодветниот период за вакви интервенции, бидејќи на тој начин се намалува можноста за повторно брзо разраснување на ресите во текот на летната туристичка сезона.
Воедно, најавено е дека второто расчистување на ресите ќе се реализира кон крајот на октомври, со цел коритото на Црн Дрим да биде целосно уредено во пресрет на празникот Водици.
Веста ја пренесува Ohridnews.com
