Пиротехничарите од Дирекцијата за заштита и спасување (ДЗС) предупредуваат на сериозна опасност откако во близина на македонско-грчката граница беше откриена неексплодирана артилериска граната, која и по повеќе од еден век останала активна.
Според информациите од ДЗС, денеска во локалитетот „Ќупот“, југозападно од Гевгелија, во непосредна близина на државната граница со Грција, е пронајден топовски проектил со калибар од 75 милиметри, кој потекнува од периодот на Првата светска војна. По неговото откривање, местото било веднаш обезбедено од надлежните служби.
Пиротехничарот Ѓорѓи Стефанов објасни дека станува збор за испукана, но неексплодирана граната која сè уште претставува исклучително висок ризик. Тој нагласи дека дури и минимален механички удар може да предизвика нејзино активирање, а евентуалната експлозија би можела да има смртоносни последици во радиус од околу 150 метри.
Надлежните најавија дека опасното убојно средство ќе биде транспортирано под строги безбедносни мерки до армискиот полигон „Криволак“, каде што ќе биде уништено според утврдените процедури за ракување со неексплодирани убојни средства.
Директорот на ДЗС, Стојанче Ангелов, упати апел до граѓаните доколку забележат предмет што наликува на експлозивна направа, во никој случај да не го допираат или преместуваат. Наместо тоа, веднаш треба да ја известат службата за итни случаи на телефонскиот број 112, за надлежните безбедно да интервенираат.
Веста ја пренесува Дирекција за заштита и спасување.
