Во Скопската зоолошка градина денес владее празнична атмосфера, бидејќи морските лавови Кан и Гете го одбележуваат својот роденден.
Од ЗОО Скопје информираат дека станува збор за двојна роденденска прослава на нивните двајца миленици. Кан е роден на 16 јуни 2008 година во Хрватска, додека Гете е роден на 18 јуни 2018 година во Германија. И покрај разликата во годините, денес заедно го слават својот посебен ден, со желби за уште многу здрави, активни и среќни години во Скопје.
Посетителите на зоолошката имаат можност секојдневно одблиску да ги гледаат морските лавови за време на хранењето и медицинскиот тренинг, кој се одржува во 11:00 и 14:00 часот. Од зоолошката објаснуваат дека овие активности не се само атракција, туку и важен дел од грижата за животните, бидејќи овозможуваат следење на нивното здравје и однесување.
Дополнително, секој петок, кога се врши чистење на нивниот базен, Кан и Гете уживаат во својот „спа ден“ – привремено сместени во помали базени со солена вода, додека нивниот простор се подготвува за нови пливачки игри и активности.
Веста ја пренесува Skopjeinfo.mk
