Во скопската населба Козле, на улицата „Јуриј Гагарин“ број 33, спроти „Homax“ и „Vero“, вчера повторно дошло до паѓање на поголем дел од фасада од станбена зграда – по втор пат на истото место.
Овојпат одронот завршил директно врз паркирани автомобили во близина на објектот. Според првичните информации, нема повредени лица, но е причинета материјална штета која допрва ќе се проценува.
Станарите велат дека ова не е прв ваков случај. Тие потсетуваат дека сличен инцидент се случил и минатата година во јули, што дополнително ја зголемува нивната загриженост за безбедноста на објектот.
Една од станарките, чие возило е меѓу оштетените, за медиумите изјавила дека веднаш биле известени надлежните служби, меѓу кои Центарот за управување со кризи, полицијата и Општина Карпош. Таа нагласила дека оштетени се најмалку три возила и дека сè уште не е јасно кој ќе ја сноси штетата.
Дополнително, жители и медиуми потсетуваат дека пред неколку години сличен инцидент се случил во непосредна близина, кога падната фасада оштетила автомобил на актерот Васко Тодоров, познат како „Тошо Малерот“.
Веста и фотографијата ги пренесува Skopjeinfo.mk
