Туристи кои патувале со брод северно од Лефкада, на пат кон Паксос, доживеале исклучително ретка природна глетка – дури пет китови кашалоти биле забележани како излегуваат на површината на Јонското Море.
Очевидците ја споделиле оваа несекојдневна сцена на социјалните мрежи, а покрај визуелниот впечаток, тие слушнале и карактеристични звуци што ги испуштаат овие морски цицачи. Според експертите, тие звуци најверојатно се користат за меѓусебна комуникација.
Кашалотите се најголемите китови со заби и вообичаено можат да се сретнат во грчките води во текот на целата година, особено во подрачјето на Хеленскиот ров.
Како врвни предатори во морскиот синџир на исхрана, тие имаат значајна улога во одржувањето на рамнотежата во екосистемот. Сепак, нивниот опстанок е загрозен поради интензивниот поморски сообраќај, ризикот од судири со бродови, загадувањето на морето и сè помалиот достапен плен.
Се проценува дека во Средоземното Море живеат само околу 150 до 190 кашалоти, поради што овој вид се смета за загрозен.
Веста и видеото ги пренесува Skopje1.mk
