Руски државјани доживеале непријатно разочарување и останале без планираниот одмор во Македонија откако се потпреле на информација добиена од алатката „Четџипити“ во врска со визниот режим.
Според видео кое се прошири на социјалните мрежи, патникот раскажува дека заедно со сопругата и детето однапред купиле авионски билети од Истанбул до Скопје, резервирале сместување во хотел и изнајмиле автомобил за престојот.
Пред да тргне на пат, тој побарал од „Четџипити“ информација дали му е потребна виза за влез во Македонија. Како што тврди, добил одговор дека виза не е потребна, поради што семејството без сомнеж ги завршило сите подготовки и се упатило кон аеродромот.
Но таму ги дочекала непријатна ситуација – при проверка на документите им било соопштено дека не ги исполнуваат условите за влез и нема да им биде дозволено да се качат на летот за Скопје.
Разочараниот патник во видеото вели дека се обидел да го докаже спротивното, па дури покажал и снимка од одговорот што го добил од вештачката интелигенција, но тоа не помогнало и одлуката на авиокомпанијата останала непроменета.
На крајот, наместо планиран одмор во Македонија, семејството останало на аеродром, и покрај тоа што однапред ги платиле билетите, хотелското сместување и автомобилот за изнајмување.
Веста и видеото ги пренесува Слободен печат.
