Три деца и едно возрасно лице го загубија животот откако автомобил излета од коловозот и удри во група велосипедисти во југозападниот дел на Холандија, соопшти полицијата.
Несреќата се случила близу Фогелварде, во покраината Зеланд, додека групата од 14 ученици и двајца возрасни била на училишна екскурзија. Според првичните информации, автомобилот не ја следел кривината на патот и директно се судрил со велосипедистите.
Три лица починале на местото на несреќата, а четворица биле тешко повредени. Еден од нив подоцна им подлегнал на повредите во болница.
Полицијата приведе 19-годишен маж, но се уште се истражува дали тој управувал со возилото и каква е неговата улога во трагедијата.
Учениците биле од основното училиште во градот Аксел, а заедно со наставниците уживале во училишната екскурзија која за жал завршила во катастрофа.
На местото на несреќата се забележува тешко оштетен автомобил завршен во канал покрај патот. Во спасувачката операција учествувале седум амбулантни возила и три медицински хеликоптери, а повредените биле префрлени во болници во Гент, Антверпен и Ротердам.
Холандскиот премиер Роб Јетен ја изрази својата шокираност:
„Она што требаше да биде еден од најсреќните денови за секое дете и секое основно училиште – училишната екскурзија – заврши како кошмар.“
Веста ја пренесува Plusinfo.mk
