Пожарникар од Службата за вонредни ситуации во Шабац покажа исклучителна храброст откако спречи обид за грабеж во локална продавница, јавуваат српските медиуми.
Според информациите, пожарникарот Лука Богиќевиќ се нашол во продавницата во моментот кога маскиран маж со качулка влегол и, заканувајќи се со нож, побарал од продавачката да му ги предаде парите од касата.
Снимката објавена од српското Министерство за внатрешни работи покажува како напаѓачот агресивно мавта со ножот и се обидува да ја заплаши вработената. Наместо да се повлече, Богиќевиќ веднаш реагирал, му се спротивставил на разбојникот и успеал да го оттурне надвор од објектот.
Од Министерството соопштија дека пожарникарот останал присебен и решителен, по што осомничениот бил совладан и отстранет од продавницата. Набргу потоа, полициските службеници го идентификувале и го привеле напаѓачот.
Во инцидентот нема повредени лица, а благодарение на брзата реакција не биле одземени ниту пари.
„Храброста не се покажува само за време на службените интервенции. Таа е дел од личноста и карактерот. Пожарникарите се херои и во секојдневните ситуации кога е неопходно да се заштитат граѓаните“, наведоа од МВР на Србија.
Веста ја пренесува Слободен печат.
