Поранешниот прв вицепремиер Артан Груби го одбележа својот 49-ти роденден додека се наоѓа во куќен притвор, а јавноста сè уште очекува одлука од обвинителството дали ќе биде покренато обвинение против него во случајот поврзан со Државна лотарија. Во истрагата, Груби е осомничен за злоупотреба на средства во вредност од 8,2 милиони евра.
По повод неговиот роденден, на социјалните мрежи беа објавени бројни честитки и пораки за поддршка. Дополнително внимание привлече транспарентот поставен на надвозникот кај Мавровка, во близина на плоштадот „Скендербег“, на кој пишуваше: „Среќен роденден, кралу“, а веднаш под него и пораката „Кралот е назад“.
Груби неодамна се врати во Македонија по повеќемесечен престој во Косово. Тој ја напушти земјата откако во декември 2024 година беше отворена истрага за работењето на Државната лотарија. Во меѓувреме беше предмет на меѓународна потерница, а по враќањето беше приведен на граничен премин и спроведен во затворот „Скопје“ во Шутка.
Сепак, неговиот престој во притвор траеше само неколку часа. Откако изразил загриженост за сопствената безбедност во затворската установа, а по извршените проценки од надлежните органи, судот донел одлука мерката притвор да биде заменета со куќен притвор.
Основното јавно обвинителство го товари за кривично дело „проневера во службата“, предвидено со член 354 од Кривичниот законик. Истрагата сè уште трае, а засега нема официјална информација дали против поранешниот вицепремиер ќе биде поднесен обвинителен акт.
Веста ја пренесува Infomax.mk
