Девојка преку сведоштво на социјалните мрежи алармира за вознемирувачка ситуација која, според нејзините наводи, се случила вчера попладне на Средно Водно. Таа тврди дека додека престојувала сама во еден пооддалечен дел од природата, била изненадена од појава на целосно гол маж.
Како што раскажува, инцидентот се случил надвор од фреквентните патеки, на ливада каде што одмарала.
„Лежев на тревата кога забележав човек без облека како ми се приближува. Беше оддалечен околу 150 метри и ми се обрати со прашањето: ‘Како се викаш?’ Се исплашив, веднаш станав и му кажав дека ќе ја известам полицијата, по што почнав гласно да викам“, вели девојката.
Според нејзиното сведоштво, по нејзината реакција мажот веднаш се оддалечил и почнал да бега по патеката во надолна насока.
„Успеав да земам камен и да се јавам на другарка за да побара помош од полицијата, но лицето веќе беше исчезнато“, додава таа.
Таа посочува дека не успеала добро да го запамети изгледот на мажот, но нагласува дека случката оставила силен впечаток и чувство на несигурност.
„За среќа, немаше физички напад ниту директна закана, но ситуацијата беше крајно непријатна и вознемирувачка. Бев навистина потресена“, раскажува девојката.
Според нејзините информации, настанот се случил околу 17:30 часот, во текот на денот.
Таа решила јавно да го сподели своето искуство со цел да ги предупреди останатите посетители на Водно да бидат претпазливи, особено ако се движат сами во помалку посетени и изолирани делови од планината.
„Не можам да претпоставам како би реагирал некој друг во ваква ситуација, но сметам дека е важно луѓето да бидат информирани и внимателни“, вели девојката, која побарала да остане анонимна.
Веста ја пренесува Skopje1.mk
